Category: Latori tabili Paitor

Pada tọọ wa pẹlu idupẹ | Paito J.O. Lawal

Post author By Pastor J.O. Lawal
Post date June 6, 2021
No Comments on Pada tọọ wa pẹlu idupẹ | Paito J.O. Lawal

Ọjọ: Okudu 06, 2021 | Nọmba: Vol. 10, No. 5

Olufẹ: kaabọ sinu ọsẹ keji ninu oṣu Okudu 2021. Ki oore-ọfẹ ati aanu Ọlọrun maa ṣan lori aye rẹ ati nipasẹ aye rẹ laini odiwọn ninu ọsẹ naa ati ni gbogbo eyi ti o ku ninu ọdun yi, ni orukọ Jesu. Amin.

Wayi o, bi o tilẹ jẹ pe o dara jọjọ lati ma gbadura ni iru ọna yi ati lati ma reti pe ki Ọlọrun dahun, a tun nilo lati jẹ ki o ye wa pe ti a ko ba ma fi imoore ti o peye han lori gbogbo awọn nkan ti O ti n ṣe fun wa, ko yẹ ki a maa reti ki O tun ṣe jubẹẹ lọ fun wa. Mi o wa sọ pe o di dandan ki Ọlọrun ma ṣe ju bi O ṣe n ṣe fun wa latẹyin wa lọ, ti a ko ba fi imoore han si fun awọn nkan ti O ti ṣe fun wa. Ọlọrun ni Oun jẹ; ko ki i ṣe eniyan. Nitorina, ko ki i fi gbogbo igba duro de wa lati dupẹ lọwọ rẹ tabi fi imoore han si fun awọn nkan ti O ti ṣe fun wa tabi ti O n ṣe fun wa ki O to o ṣe jubẹẹ lọ si fun wa.

Sibẹsibẹ, gbogbo igba ni O ma n reti pe ki a fi imoore wa han lori awọn nkan ti O n ṣe ninu aye wa tabi ti O ti ṣe fun wa. Fun apẹẹrẹ, Luuku, ninu iwe ihinrere rẹ, sọ fun wa bi awọn adẹtẹ mẹwa kan ṣe tọ Jesu Oluwa wa fun iwosan. Nigbati wọn si de, ko le wọn danu. Dipo eyi, O ṣaanu fun wọn, O si sọ fun wọn pe ki wọn lọ fi ara wọn han awọn alufa. Nitorina, wọn lọ, bi O ti ṣe paṣẹ fun wọn. Nigba ti wọn si n lọ, lojiji ni wọn ri pe a ti wẹ wọn mọ — ẹtẹ wọn ti poora. (Wo: Luuku 17:11-14)

Ki wa ni nkan ti o tọ fun awọn ọkunrin wọnyi lati ṣẹ? Pẹlu imọ kekere ti mo ni nipa bi o ṣe yẹ ki a ma ṣe nkan, mo gbagbọ pe nṣe ni o yẹ ki wọn pada tọ Jesu lọ lati kọkọ fi tọkantọkan dupẹ lọwọ rẹ fun nkan ti O ṣe fun wọn. Lotitọ, pẹlu bi nkan ṣẹ ri wọn ni akoko yẹn, wọn le ma ni oore-ọfẹ lati ni owo lọwọ tabi awọn nkan miran ti wọn le mu tọ Jesu wa lati dupẹ lọwọ rẹ. Amọ, o tilẹ wa kere ju, wọn le pada sọdọ rẹ lati dupẹ lọwọ rẹ fun iwosan wọn, ki wọn to wa bẹrẹ si ni woye nkan ti wọn fẹ ṣe pẹlu ibẹrẹ tuntun ti O ti fun aye wọn.

Njẹ wọn wa ṣe eleyi bi? Ṣe gbogbo wọn naa lo pada lọ wa Jesu ri lati fi imoore wọn han si fun nkan ti O ṣe fun wọn? O ti o! Ẹnikan ṣoṣo lara wọn, ara Samaria kan, nikan naa lo pada tọ ọ wa lati juba rẹ ati lati dupẹ lọwọ rẹ fun iwosan ti o rigba. Eyi ko si dun mọ Oluwa ninu rara tobẹ ti O fi sọ pe, “Awọn mẹwaa ki a sọ di mimọ? Awọn mẹsan yooku ha da? A ko ri ẹnikan ti o pada wa fi ogo fun Ọlọrun, bikoṣe alejo yii. O si wi fun un pe, Dide ki o si maa lọ; igbagbọ rẹ mu ọ lara da.” (Luuku 17:17-19)

Eyi tunmọ si pe Oluwa gan n reti ki awọn ọkunrin mẹwẹẹwa yi pada wa lati dupẹ lọwọ rẹ fun iwosan wọn. Ko kuku sọ pe ki wọn mu owo tabi ohun miran wa fun Oun. Bẹẹ si ni ko gba nkankan lọwọ wọn ki O to wo wọn san, nitoripe iwosan jẹ ẹbun ọfẹ Ọlọrun ni gbogbo igba. Eyi naa ko si tun wa jasi pe nkan ti ko dara ni pe ki wọn mu owo tabi ohun ini wọn miran wa lati fi imoore wọn han si i, bi o tilẹ jẹ pe o fẹrẹ daniloju pe ko ni i gba lọwọ wọn. Ko si nkan ti o buru nibẹ rara.

Ka tilẹ wa wo lati ẹgbẹ miran, gẹgẹ bi ofin Mose, awọn nkan kan wa ti ẹnikẹni ti o ba gba iwẹnumọ kuro ninu arun bi ti ẹtẹ gbọdọ ko wa si ọdọ alufa ti you ṣe iwẹnumọ ẹṣẹ fun. Idi si ni yi ti Oluwa fi sọ fun awọn ọkunrin wọnyi lati lọ fi ara wọn han awọn alufa. Bi ofin na si tun ṣe tẹsiwaju lati sọ, awọn nkankan wa lara awọn nkan ti irufẹ ẹni na ba ko wa ti yoo jẹ ti alufa ti o n ṣipẹ si Ọlọrun lori ọrọ rẹ. Ti o ba wa tọ fun alufa ti ko ṣe nkankan lori bi wọn ṣe gba ilera lati gba ọrẹ lọwọ wọn, ki wa ni ki a sọ nipa ti ẹni ti o wo wọn san? Ṣe ko lẹtọ lona ti o ga ju ti alufakalufa lọ lati gba ọrẹ ọpẹ pẹlu ijọsin lọwọ wọn? O lẹtọ. (Wo: Lẹfitiku 14:1-31)

Ṣugbọn ko tilẹ wa reti nkan miran lati ọdọ wọn ju ọrọ iyin ati ọpẹ lọ. Amọ, o wa ṣeni laanu pe ẹnikan ṣoṣo ninu wọn ni o pada wa lati fun ni eyi. Ẹnikan ti o pada wa lati fi imoore han yi nikan naa si ni o ri ọrọ Ibukun miran si gba lati ẹnu rẹ — igbagbọ rẹ mu ọ lara da. Nkan ti ọrọ ibukun miran yoo wa jasi ninu aye ọkunrin yi Ọlọrun nikan ni O le sọ. Ṣugbọn o ṣa ri nkan gba si lati ọwọ rẹ ju awọn yoku lọ nitoripe o pada wa lati dupẹ.

Ki gan wa ni itan yi n kọ wa? Ohun naa ni pe awọn nkan kan wa ti a le ma rigba lọwọ Ọlọrun, ti a ko ba kọ lati ma fi imoore han si fun awọn nkan ti O n ṣe fun wa. O ṣi n ṣe oniruuru nkan fun wa ti ọgbọn wa, owo wa, ipo wa, iyi wa tabi ẹkọ wa ko le ri fun wa. Nitorina, ẹ jẹ ki a ye jẹ abaramoorejẹ, ki a si bẹrẹ si ni fi tọkantọkan, ori pipe ati pẹlupẹlu awọn nkan ini wa fi imoore wa han si fun awọn nkan ti O n ṣe fun wa. Mo si gbadura pe ki a sọ ọkan wa ji, ki a si tun fun wọn ni okun lati ma fi gbogbo igba ṣe ohun ti o tọ lori ọrọ yi, ni orukọ Jesu. Amin.

Ki o ni ọsẹ alarinrin.

Tags Pada tọọ wa pẹlu idupẹ

Latori tabili Paitor

O ṣi le ṣe ju bẹẹ lọ – J.O. Lawal

Post author By Pastor J.O. Lawal
Post date May 2, 2021
No Comments on O ṣi le ṣe ju bẹẹ lọ – J.O. Lawal

Ojo: Ebibi 02, 2021 | Nomba: Vol. 9, No. 52

Olufẹ: ki oore-ọfẹ, aanu ati alaafia jẹ tirẹ titi lailai lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu oṣu tuntun yi, oṣu Ebibi 2021. Adura mi si ni pe ki aṣeyọri pẹlu irọrun jẹ tirẹ ninu gbogbo iṣẹ rẹ ti o tọna ninu oṣu naa, ni orukọ Jesu. Amin.

Ọrọ iyanju mi si ọ, bi a ṣe n bẹrẹ oṣu yi, ni pe ki o tunbọ fi ara rẹ jin siwaju ati siwaju si ni ṣiṣe iṣẹ Oluwa. Ki si ni idi? Akọkọ, idi ni pe ifẹ Ọlọrun fun ọ ni eyi. Pọọlu, ninu lẹta rẹ si awọn ara Korinnti, sọ pe, “Nitori naa ẹyin ara mi olufẹ, ẹ maa duro ṣinṣin, laiyẹṣẹ, ki ẹ si maa tẹsiwaju ninu ṣiṣe iṣẹ Oluwa nigba gbogbo, niwọn bi ẹyin ti mọ pe iṣẹ yin kii ṣe asan ninu Oluwa.” (1Korinnti 15:58) Njẹ o ri bayi? Ki ni gbedeke igba ti o fi yẹ ki a ma fi ara wa jin fun iṣẹ Ọlọrun? Ko si gbedeke igba fun eyi rara. Gbogbo igba ni o ye ki a ma fi ara wa jin fun iṣẹ rẹ. Eyi tunmọ si pe nṣe ni o yẹ ki a gbajumọ nkan ti O fẹ ki a ṣe ninu ijoba rẹ, ki a si ma ti ọwọ ọlẹ tabi imẹlẹ bọ ọ.

Nkan ti mo n sọ ni pe Ọlọrun fẹ ki a ma pọ si ni iwulo ni ijọba rẹ, ki a ma si ṣe dinkun rara. Nitorina, bi o ṣe wu ki awọn nkan ti o n ṣe ninu ijọba rẹ le pọ to, o ṣi le ṣe ju bẹẹ lọ. O le bukun fun awọn eniyan pẹlu ọrọ Ọlọrun, adura rẹ, ẹbun rẹ ati bẹẹbẹẹ lọ ju bi o ti ṣe n ṣe ni akoko yi. O kan nilo lati mọ lọkan rẹ pe Ọlọrun n gboju le ọ lati ṣiṣẹ siwaju ati siwaju si fun un, ki o ṣi bẹrẹ si ni rin ni ibamu pẹlu afiyesi yi.

Idi keji ti a fi nilo lati fi ara wa jin lati ṣiṣẹ Ọlọrun siwaju ati siwaju si ni pe gbogbo igba ni Ọlọrun, Baba wa, funrarẹ gan n fi n ṣiṣẹ. Gbogbo igba ni O fi n bukun fun awọn eniyan, yi aye wọn pada, tu wọn silẹ, wo wọn san, gbe wọn soke ati bẹẹbẹẹ lọ. Ko fi igba kankan su u lati ṣe rere fun awọn eniyan ati lati ṣe idajọ ododo ni orilẹ aye. Eyi i gan ni o fun Jesu ni oriya lati ma fi gbogbo igba gbajumọ iṣẹ rẹ nigba ti O wa ni aye yi. Si ranti pe O sọ pe, “Baba mi n ṣiṣẹ titi di isinsinyi, emi si n ṣiṣẹ.” (Johanu 5:17) Niwọn igba ti awa na si jẹ ọmọ Baba, a gbọdọ tẹra mọṣẹ.

Idi kẹta ti a fi ni lati pọ si ninu iṣẹ Ọlọrun, gẹgẹ bi Pọọlu ti ṣe fi ye wa, ni pe iṣẹ wa ki i ṣe lasan. Ki ni itunmọ eyi? Eni, o tunmọ si pe ohun ti a n ṣe jẹ pataki si Ọlọrun. Iwaasu wa, adura wa, fifi-funni wa, ṣiṣiṣẹ lati sọ awọn eniyan di ọmọ ẹyin ati bẹẹbẹẹ lọ ṣe pataki si, nitori pe O n lo awọn nkan yi lati mu ete rẹ ṣẹ ninu aye awọn eniyan. Eji, o tunmọ si pe Ọlọrun yoo pin wa lere fun gbogbo iṣẹ ti a ba fi tọkantọkan ṣe fun un. Awọn eniyan le ma kọbiara tabi yin wa fun laalaa wa ninu ijọba Ọlọrun. Ṣugbọn Ọlọrun ko ni fi igba kankan foju fo ohunkohun ti a ba ṣe fun un, bi o tilẹ jẹ pe a kan fun ọkan lara awọn ọmọ rẹ ni omi ni (Matiu 10:42). Nitorina, a ni awọn idi ti o gbamuṣe lati fi ara wa jin fun iṣẹ rẹ.

Amọ ṣe o wa ṣeeṣe fun wa lati fi ara wa jin siwaju ati siwaju si fun iṣẹ Ọlọrun, lalai ṣaarẹ tabi rẹwẹsi? Bẹẹni, o ṣeeṣe. O ṣeeṣe nitoripe a ko fi wa silẹ lati da iṣẹ rẹ ṣe. Oun gangan yoo wa pẹlu wa ati ninu wa ni gbogbo igba lati ṣe ohunkohun ti O ba fẹ ki a ṣe. Ki a tilẹ sọ otitọ, a ko le ṣe iṣẹ rẹ kankan rara, ti ko ba ti ipasẹ wa ṣe. Ohun ti o ba ṣe ninu wa, pẹlu wa ati nipasẹ wa nikan naa ni o le mu ete rẹ wa si imuṣẹ, ti O si tun le fun wa ni ere le lori. Idi si ni yi ti Pọọlu ṣe sọ pe, “Nitori pe Ọlọrun ni n ṣiṣẹ ninu yin, lati fẹ ati lati ṣiṣẹ fun ifẹ inu rere rẹ.” (Filipi 2:13)

Nitorina, a ko ni idi kankan lati bẹru iṣẹ rẹ ti o wa niwaju wa, bi o ti wu ki iṣẹ na dabi ẹni pọ to tabi dabi eyi ti ko le e ṣeeṣe to. A kan nilo lati ma rin pẹlu afiyesi pe a ko ni da ṣiṣẹ rẹ — Oun funrarẹ wa pẹlu wa lati ṣe e. Bi O ba si ṣe n ṣiṣẹ ninu wa ati nipasẹ wa, a le ma reti ki oniruuru iṣẹlẹ iyanu bẹrẹ si ni ṣẹlẹ ninu aye wa ati ninu aye awọn ti o wa ni awujọ wa. Gẹgẹ bi a ṣe kọ iwe rẹ: “Wọn si jade lọ, wọn si n waasu nibi gbogbo, Oluwa si n ba wọn ṣiṣẹ, o si n fi idi ọrọ naa kalẹ, nipa ami ti n tẹle e. Aami.” (Maaku 16:20) Nibakanna, ti awa na ba gbajumọ iṣẹ rẹ, lori gbedeke oore-ọfẹ rẹ lori wa, yoo ba wa ṣiṣẹ, yoo si tun mu wiwa rẹ pẹlu wa daju nipa oniruuru iṣẹ ami ati iyanu ti yoo jẹ ki awọn eniyan ma gboriyin fun.

Ki o ni oṣu Ebibi 2021 ti o larinrin.

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Latori tabili Paitor

Jẹ ki ara rẹ ya gaga si ipe rẹ –

Post author By Pastor J.O. Lawal
Post date April 25, 2021
No Comments on Jẹ ki ara rẹ ya gaga si ipe rẹ –

Akori: Jẹ ki ara rẹ ya gaga si ipe rẹ – Lati owo: J.O. Lawal

Ojo: Igbe 25, 2021 | Atelera: Latori tabili Paitọ Nomba: Vol. 9, No. 51

Olufẹ: ki oore-ọfẹ, aanu ati alaafia jẹ tirẹ titilai lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ ti o pari oṣu Igbe 2021. Adura mi ni pe ki ọkan rẹ ma fi gbogbo igba gba okun lati tẹwọgba ipe Ọlọrun lori aye rẹ, ki o si tun mu ni pataki, ki aye rẹ ba le ma fi gbogbo igba fi ẹwa rẹ han siwaju ati siwaju si ni eyi ti o ku ni ọjọ aye rẹ. Amin.

Bi a ṣe ri ninu bibeli, ko ki i ṣe awọn ti a mọ bi adari ijọ nikan ni Ọlọrun pe. Dipo eyi, ẹnikọọkan ti o jẹ onigbagbọ ninu Kirisiti Jesu ni O pe. Ki wa gan ni a pe wa si? Akọkọ, a pe wa lati wa ni idapọ pẹlu rẹ. Bibeli sọ pe, “Olododo ni Ọlọrun, nipasẹ ẹni ti a pe yin sinu idapọ Ọmọ rẹ Jesu Kirisiti Oluwa wa.” (1Korinnti 1:9) Ṣe iwọ na ri bayi? Ọlọrun pe gbogbo wa lati gbe aye wa pẹlu rẹ, ki Oun na ba le gbe pẹlu wa ninu ibadapọ mimọ. Nitorina, ni bayi, a jẹ alabapin ninu aye rẹ, ninu ohun ti o jẹ ki o jẹ Ọlọrun, ninu iṣẹ rẹ, ninu ogo rẹ, ninu ijọba ayeraye rẹ ati pẹlupẹlu ninu ikanran awọn ọmọ eniyan mọ.

Ikeji, Ọlọrun pe wa ki O ba le fi ọgbọn rẹ ati awọn iṣẹ ara rẹ han nipasẹ wa si awọn ẹda rẹ, paapaajulọ awọn eniyan, awọn angẹli ati awọn ẹmi aimọ. Idi ni yi ti bibeli fi sọ pe, “Ki a baa le fi ọpọlọpọ oniruuru ọgbọn Ọlọrun han nisinsinyi fun awọn ijoye ati awọn alagbara ninu awọn ọrun, nipasẹ ijọ. Gẹgẹ bi ipinnu atayebaye rẹ, eyi ti o mu ṣe nipasẹ Kirisiti Jesu Oluwa wa.” (Efesu 3:10-11) O tun sọ pe, “Ṣugbọn ẹyin ni iran ti a yan, olu-alufaa, orilẹ-ede mimọ, eniyan ọtọ; ki ẹyin ki o le fi ọla nla ẹni ti o pe yin jade kuro ninu okunkun sinu imọlẹ iyanu rẹ han.” (1Peteru 2:9)

Ṣe iwọ na ri bayi? Ọlọrun pe wa jade kuro ninu okunkun sinu imọlẹ iyanu rẹ, O si ṣe wa ni eniyan ara ọtọ si i. Nitorina, o jẹ ẹni ọtọ si Ọlọrun. Emi naa jẹ ẹni ọtọ si Ọlọrun. Gbogbo wa jẹ ẹni ọtọ si Ọlọrun. Ko si si ẹnikẹni ninu wa ti o jẹ ẹni ọtọ si i ju awa yoku lọ. Bakanna ni gbogbo wa ṣe jẹ pataki si to, nitoripe iye kan naa ni O san lati ra gbogbo wa pada (1Peteru 1:18-19). Ki si ni idi ti O fi ṣe wa ni ayanfẹ rẹ ni ọna yi? Idi ni pe ki O ba le bẹrẹ si ni fi oniruuru ọgbọn rẹ ati awọn iṣẹ iyanu rẹ han nipaṣẹ ẹnikọọkan wa, ti ko si ki i ṣe nipasẹ awọn paitọ, wolii ati awọn adari ijọ wa nikan.

Nitorina, nibikibi ti o ba wa ati ipo yowu ti o le wa ninu aye yi, Ọlọrun ti yan ọ, O si tun ti pe ọ lati ma gbe igbe aye ti yoo jẹ ki awọn eniyan, angẹli ati ẹmi aimọ mọ pe Ọlọrun ti o ga, ti o gbọn, ti o si tun dara ni Oun jẹ. Njẹ irufẹ igbe aye yi ni o wa n gbe bi? Ṣe igbe aye ti o ga, igbe aye ọlọgbọn ati igbe aye daradara ni o n gbe bi, igbe aye ti awọn ti o wa ni ayika rẹ ko le ṣe alaikọbiara si tabi alaifẹran? Abi igbe aye ti ko wu ni lori, igbe aye omugọ ati igbe aye ti o n rin awọn eniyan lara ni o n gbe?

Ki a sọ ododo, igbe aye ti ọpọ awọn eniyan Ọlọrun n gbe nibi ti wọn wa jẹ eyi ti ko le wu awọn ti o wa ni ayika wọn lori tabi ti o le fa wọn mọra. Nkan ti mo n sọ ni pe igbe aye ti wọn n fi ojoojumọ gbe ko wu awọn ti aye yi lori lati fẹ ni nkan ti wọn ni tabi da bi wọn ṣe da. Bawo si ni ori o ṣe wu ẹnikẹni lati fẹ ẹ dabi iru ẹni ti o jẹ ninu Kirisiti, niwọn igba ti ara iwọ gan ko ya gaga si i tabi niwọn igba ti o ro pe o kudiẹ kaato fun ọ nitoripe o ko ni awọn nkan ti wọn ni tabi nitoripe o ko wa ni awọn ipo ti wọn wa?

Bi bibeli ṣe sọ fun wa, Ọlọrun ko yan ẹnikẹni ninu wa tabi kọ ẹnikẹni ninu wa silẹ nitori ipo wa ni awujọ, yala ipo nla ni tabi ipo kekere. Ko yan tabi kọ ẹnikẹni ninu wa silẹ nitoripe ko jẹ olowo, ẹni ti o kawe rẹpẹtẹ tabi gbajumọ. Dipo bẹẹ, O yan wa lalai fi ti bi a ṣe jẹ nipa ti aye yi ṣe. O si yan wa lati ma a ṣe awọn nkan ọgbọn ati awọn nkan ti o ga, ti yoo si ja awọn eniyan, angẹli ati ẹmi aimọ laya. (Wo: 1Korinnti 1:26-31)

Nitorina, ko si idi kankan ti ko fi yẹ ki ara wa ya gaga lori ipe wa, bi o tilẹ jẹ pe ipo ti o kere julọ ni a wa ni aye yi, iyẹn ipo ẹru tabi ẹlẹwọn. Fun apẹẹrẹ, nigba ti Pọọlu duro gẹgẹ bi ẹlẹwọn niwaju Ọba Agiripa, Banike ati Fẹsitusi, ti wọn jẹ ẹniyan pataki ninu aye igba naa, ko sọrọ rara bi ẹni ti ko ni laari tabi bi ẹni ti aye rẹ ti dojuru tabi bi ẹni ti ọrọ aye rẹ ti su u. Dipo eyi, o sọrọ pẹlu ara ti o ya gaga nipa igbe aye rẹ pẹlu Ọlọrun to bẹẹ gẹ ti wọn fi bẹrẹ si ni wo boya ki awọn tu u silẹ lẹsẹkẹsẹ. (Wo: Iṣe awọn apositeli 25:13-26:32)

Wayi o, nkan ti Ọlọrun n fẹ lati ọdọ wa gan an niyẹn. O fẹ ki a ma fi gbogbo igba ya awọn ara aye yi lẹnu nipa bi a ṣe n gbe ati bi a ṣe n wuwa, ki wọn ba le ma sọ pe, “Ti awọn wọnyi ko ba ki i ṣe were, a jẹ pe awọn gan ni wọn mọ nkan ti wọn n ṣe.” Nigba ti wọn ba si sunmọ wa si, awọn gan yoo wa ri aridaju pe awa gan ni a mọ nkan ti a n ṣe. Njẹ o o wa jigiri bi, ki o gbe aṣọ itiju rẹ sọnu, ki o si bẹrẹ si ni gbe igbe aye ẹni ti a da ọ lati gbe pẹlu ara ti o ya gaga? Adura mi fun ọ ni pe ki o gba iwuri ati okun lati ṣe bẹẹ gẹgẹ, ni orukọ Jesu. Amin.

Ki o ni ọsẹ alarinrin.

Tags ipe

Latori tabili Paitor

La ọna fun lati bukun fun awọn miran

Post author By Pastor J.O. Lawal
Post date October 10, 2020
No Comments on La ọna fun lati bukun fun awọn miran

Latori tabili pasito

Olufẹ: kaabọ sinu ọsẹ miran ninu oṣu Ọwara 2020. Ki oore-ọfẹ, ifẹ ati aanu Ọlọrun ma ṣan lori aye rẹ titi gbogbo ọsẹ naa yoo fi pari, ni orukọ Jesu. Amin.

Bi a ṣe wa n bẹrẹ ọsẹ tuntun yi, mo fẹ ran ọ leti pe iwọ nikan kọ ni Ọlọrun lero lati fi ara rẹ, ifẹ rẹ ati agbara rẹ han ninu aye yi. Dipo eyi, ero rẹ ni lati fi ara rẹ, ifẹ rẹ ati agbara rẹ han si gbogbo eniyan. Idi si ni yi ti bibeli ṣe sọ bayi, “Nitori ti Ọlọrun fẹ araye to bẹẹ gẹ, ti o fi ọmọ bibi rẹ kan ṣoṣo fun ni, ki ẹnikẹni ti o ba gba a gbọ ma ba ṣegbe, ṣugbọn ki o le ni iye ainipẹkun.” (Wo: Johanu 3:16)

Latori tabili Paitor

Gbogbo ipinnu ati ifẹ Ọlọrun

Post author By Pastor J.O. Lawal
Post date October 5, 2020
2 Comments on Gbogbo ipinnu ati ifẹ Ọlọrun

Latori tabili pasito

Olufẹ: ki oore-ọfẹ, aanu ati alaafia jẹ tirẹ titi lailai lati ọdọ Ọlọrun Baba wa ati Jesu Kirisiti Oluwa wa. O dun mọ mi ninu gidigidi lati ki ọ kaabọ sinu oṣu Ọwara, eyi ti i ṣe oṣu kinni ninu abala kẹrin awọn oṣu odun yi. Mo si gbadura pe ki Ọlọrun mu ọ duro ṣinṣin ninu gbogbo ete rẹ fun aye rẹ ni oṣu na ni orukọ Jesu. Amin.

Wayi o, ti o ba jẹ pe o ko mọ tabi pe o ti gbagbe, mo fẹ pe akiyesi rẹ si pe awọn oniwaasu ni ojuṣe lati kọ awọn eniyan ni ohun gbogbo ti o ni i ṣe pelu ipinnu ati ifẹ Ọlọrun. Idi si ni yi ti Pọọlu ṣe sọ fun awọn ara Kolose pe, “Nisinsinyi emi n yọ ninu iya mi nitori yin, emi si n ṣe aṣepari iṣẹ ipọnju Kirisiti ti o ku lẹyin ni ara mi, nitori ara rẹ, ti i ṣe ijọ: Eyi ti a fi emi ṣe iranṣẹ fun, gẹgẹ bi iṣẹ iriju Ọlọrun ti a fi fun mi fun yin lati mu ọrọ Ọlọrun ṣẹ.” (Kolose 1:22) Njẹ o ri bayi? Pọọlu sọ wipe iṣẹ iriju ti oun gba lọwọ Ọlọrun ni lati mu ọrọ Ọlọrun ṣẹ. Ọna miran lati ṣo eyi ni pe iṣẹ iriju Pọọlu ni lati waaṣu ọrọ ni pipeye. O tunmọ si pe ko le ṣo pe awọn ẹka bayi ninu ọrọ Ọlọrun ni oun o fi ṣe iwaasu ati pe awọn ẹka ọrọ rẹ bayi ni oun ko ni fi ṣe iwaasu. Ko le sọ wipe iwa mimọ nikan ni a ran oun lati fi se iwaasu, ko ki ṣe fififunni, tabi pe igbagbọ ni a fi ran oun lati ṣe iwasu ko ki i ṣe idajọ ayeraye. Iṣẹ rẹ ni lati polongo ohun gbogbo ti ọrọ Ọlọrun n sọ fun awọn eniyan.

Pipolongo ohun gbogbo ti o ni i ṣe pẹlu ifẹ ati ipinnu Ọlọrun ki i wa ṣe nkan ti a le ṣe ni ọjọkan. Ọpọ igba ni o jẹ pe o le gba iṣẹ aṣekara ọpọlọpọ ọdun ati suuru lọwọ ẹni ti o n waasu ọrọ Ọlọrun ki o to le fi gbogbo ifẹ ati ipinnu Ọlọrun han si awọn ti o n kọ. Ṣugbọn o ṣe e ṣe, o si gbọdọ jẹ ṣiṣe. A si ri amudaju eleyi ninu ọrọ Pọọlu si awọn alagba ijọ Efesu, eyi ti o ka bayi: “Nitori ti emi ko fa ṣẹyin lati sọ gbogbo ipinnu Ọlọrun fun yi.” (Ise Awọn Apositeli 20:27) Nitorina, wiwaasu gbogbo ipinnu ati ifẹ Ọlọrun ṣe e ṣe, o si jẹ ohun ti gbogbo oniwaasu gbọdọ fi ara rẹ jin lati ṣe.

Ṣugbọn ṣa o, erongba Ọlọrun kọ ni pe ki o jẹ kiki oniwaasu ni yo fi ara rẹ jin lati ma polongo gbogbo ifẹ ati ipinnu rẹ; erongba rẹ ni pe ki awọn ti a n kọ ni ọrọ Ọlọrun naa fi ara wọn jin lati tẹwọgba gbogbo ifẹ ati ipinnu rẹ fun aye wọn. O wa ṣeni laanu pe nkan ti a ri ninu ọpọ ọmọ Ọlọrun ni pe wọn a ma yan ẹbọ ninu iha ti wọn n kọ si ọrọ Ọlọrun. Wọn fẹ yan otitọ ọrọ Ọlọrun ti awọn olukọ wọn yoo kọ wọn ati irufẹ otitọ ọrọ rẹ ti wọn yo tẹwọgba ati ti wọn yo ṣe amulo. Nitorina, wọn a ma ti ibikan de ibikan lati wa awọn oniwaasu ti yo waasu tẹwọn lọrun. Idi si ni yi ti aye wọn ko fi baradọgba.

Awa naa nilo lati ṣe agbayẹwo aye wa lati ri boya aye wa baradọgba ninu irinajo igbagbọ wa tabi ko baradọgba. A nilo lati bere lọwọ ara wa, “Njẹ ari awọn otitọ ọrọ Ọlọrun ti a n sa fun ati ti a ko tilẹ fẹ ki wọn fi bawa sọrọ rara tabi ti a ko fẹ ṣe amulo?” Ti a ba ri, a nilo lati ronupiwada, ki a si yi iha ti a kọ si wọn pada. Idi si ni pe a ko le jẹ gbogbo nkan ti Ọlọrun fẹ ki a jẹ, niwọn igba ti a ko ba mura lati mọ gbogbo ifẹ ati ipinnu rẹ fun wa, ki a si fi aye gba wọn ninu aye wa.

Lotitọ, a le ma le fi ara da ọna ti awọn kan n gba ṣe alaye tabi amulo awọn isọri ọrọ Ọlọrun kan. Eyi ko wa tunmọ si pe ki a ma ni itara lati mọ nkan ti Ọlọrun n sọ nipa awọn nkan wọnyi ati lati ṣe amulo wọn ni aye wa. Fun apẹẹrẹ, ọpọ ẹkọ odi ni o wa ni oni lori fififuni, paapaajulọ fififun awọn adari wa ninu ijọ. Sibẹsibẹ, eyi ko jasi pe ọrọ Ọlọrun ko pa a laṣẹ fun wa lati ma fi nkan ini wa ran awọn ti o n fi ọrọ Ọlọrun bọ wa lọwọ (1Korinnti 9:14; Galatia 6:6). Ti a ba si kọ lati mu ẹkọ fififunni ati fifi ohun ini wa ran awọn ti o n fi ọrọ Ọlọrun bọ wa lọkunkundun, nitori pe awọn kan n ṣe eyi lọna aitọ, a ti n ṣe aigbọran si Ọlọrun niyẹn. Lotitọ o, o le e jẹ pe a n gbọran si lẹnu lori gbogbo ọrọ aye wa yoku. Ṣugbọn niwọn igba ti a ti n ṣe aigbọran si lẹnu ni ọna kan ni aye wa, ko si bi a ṣe le jẹgbadun gbogbo Ibukun ati ipese rẹ fun aye wa. Lafikun, o tun le wa jẹ pe abala aye wa ti a ko ti gbọran si lẹnu yi ni yoo jẹ ọna fun Satani lati fiya jẹ wa.

Nitorina, ji kuro ninu ogbe ti o n to, ki o si rẹ ara rẹ silẹ lati gba gbogbo nkan ti Ọlọrun n ba ọ sọ lori iwa mimọ, idajọ ayeraye, fififunni, ifẹ ati bẹẹbẹẹlọ nipasẹ ọrọ rẹ. Iwọ sati rẹ ara rẹ silẹ lati gba ẹkunrẹrẹ ọrọ rẹ fun ọ. Nipa eyi, gbogbo nkan ti o ku diẹ kaato ninu irinajo igbagbọ rẹ ni a o pese, aye rẹ yoo si jẹ kikọ lati gbe iwa Jesu Kirisiti yọ lẹkunrẹrẹ.

Ki o ni oṣu Ọwara 2020 idẹra.

Copyright © 2020, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to alaythiabiblechurch@gmail.com | alaythia4all@gmail.com or call: 08037592851 (WhatsApp Number: 07085711280)
Lati owo: J.O. Lawal | Ojo: Owara 04, 2020 | Atelera: Latori tabili Paitọ | Nomba: Vol. 9, No. 22

Latori tabili Paitor

Ọrọ ore-ọfẹ rẹ

Latori tabili pasito

Olufẹ: ki oore-ọfẹ, aanu ati alaafia jẹ tirẹ titi lailai lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ tuntun yi, mo si gbadura pe ki o gba idari ati okun lati ri aye de ibi ti ipese Ọlọrun ti o dara julọ fun ọ ninu ohun gbogbo wa ati lati gbadun rẹ titi ọsẹ yi yo fi pari, ni orukọ Jesu. Amin.

Njẹ, bi o ṣe rẹwa to lati gba iru adura yi fun ọ naa ni o si ṣe ṣe pataki to fun ọ lati mọ pe adura yi ko le rọpo ṣiṣe amulo ọrọ Ọlọrun ni aye rẹ. Nkan ti mo n sọ ni pe adura ko fi igba kankan jẹ nkan ti a le fi ṣe pasiparọ fun ṣiṣe amulo ọrọ Ọlọrun. Nitorina, bi o ti lẹ jẹ pe o ṣe pataki ki a ma fi gbogbo igba gbadura ki a ba le tẹwọgba ipese Ọlọrun fun wa, ki a si tun gbadun rẹ, ti a ko ba fi ara wa jin lati ma ṣe amulo ọrọ rẹ, awọn ipese rẹ kan wa ti a ko ni le na ọwọ gan tabi gbadun.

Latori tabili Paitor

Takete si agbere

Olufẹ: Kaabọ si inu ọsẹ miran ninu osu Owewe 2020. Ki alaafia ati ayọ ti o n ti ọwọ Ẹmi Ọlọrun wa kun aye rẹ titi ọsẹ na yoo fi pari, ni orukọ Jesu. Amin.

Njẹ bi a se bẹrẹ ọsẹ tuntun yi, jẹ ki n ran ọ leti ọrọ Pọọlu ti o sọ wipe, “Nitori eyi ni ifẹ Ọlọrun, pe ki ẹ wa ni mimọ, ki ẹ si takete si agbere: ki olukuluku yin mọ bi oun iba ti maa ko ara rẹ ni ijanu ni iwa-mimọ ati ni ọla; Kii ṣe ni ṣiṣe ifẹkufẹẹ, gẹgẹ bi awọn Keferi ti ko mọ Ọlọrun: Ki ẹnikẹni ma ṣe dẹṣẹ si arakunrin rẹ nipa ohunkohun: nitori Oluwa ni olugbẹsan ninu gbogbo nnkan wọnyi, gẹgẹ bi awa ti kilọ fun yin tẹlẹ ri, ti a si n jẹrii yin pẹlu.” (1Tesalonika 4:3-6) Ki si ni idi ti mo fi mu ọrọ iyanju yi tọ ọ wa ni akoko yi? Idi ni pe, gẹgẹ bi o ti ri ni igba aye Pọọlu, bẹẹ na ni o ṣe ri ni akoko yi — ẹṣẹ agbere wọpọ lode oni; ọpọ ọmọ Ọlọrun ni o si n kopa ninu rẹ (1Korinnti 7:2).

Nkan ti mo n sọ ni pe iṣekuṣe ko fi gbogbo ara ja mọ nkankan mọ loju ọpọ ọmọ Ọlọrun loni. Wọn ko ri ibaraẹnisun larin awọn ti ko ti gbeyawo tabi larin awọn ti ko ki i ṣe tọkọtaya si nkankan pataki mọ. Idi si ni pe ọda ti awọn ti aye yi fi n fi ojoojumọ kun iṣekuṣe niyẹn. O tunmọ si pe awọn iwa ti wọn n wu ati awọn ọrọ ti wọn n sọ jẹ ki o da bi ẹni pe agbere, pansaga tabi ikorajọpọ lati ṣe iṣekuṣe dara jọjọ. Wọn a si ma fun awọn ti ko darapọ mọ wọn ninu radarada ti wọn ṣe ni ero pe nkan n ṣe wọn tabi pe wọn n padanu adun ibaraẹnilopọ.

Ṣugbọn ki ni ifẹ Ọlọrun fun wa? Gẹgẹ bi Pọọlu ṣe sọ fun wa ninu ẹsẹ bibeli ti o wa ni oke yẹn, ifẹ Ọlọrun fun wa ni pe ki a takete si agbere, ki a si kọ bi a ṣe le ko ara wa nijanu ni ọna ti o mọ, ti o si niyi. Wa kiyesi pe ibaraẹnisun gan kọ ni Ọlọrun ni ki a takete si. Nkan ti O ni ki a takete si ni iṣekuṣe, eyi ti i ṣe ọna aitọ ati ọna aiyẹ lati ma ba ara ẹni lopọ.

Awọn ọna aitọ yi si ni i ṣe pẹlu ibaraẹnisun ki a to fẹ ara ẹni sile, ale yiyan, ifipabanilopọ, pansaga, biba eranko lopọ, ibalopọ ọkunrinsọkurin ati obinrinsobirin, kikorajọpọ lati ṣe agbere ati ohunkohun ti o bani i ṣe pẹlu iwa eeri laarin awọn ti ko ki i ṣe tọkọtaya. Awọn nkan wọnyi ni Ọlọrun n kilọ fun wa lati takete si. Pọọlu tilẹ sọ fun wa ninu lẹta rẹ miran pe nkan ti Ọlọrun fẹ gan ni pe ki a sa fun awọn nkan wọnyi (1Korinnti 6:18-20)

Ki wa ni idi ti Ọlọrun ṣe fẹ ki a sa fun iṣekuṣe? Lakọkọ, idi ni pe iṣekuṣe a ma sọ ara eniyan, ti i ṣe tẹnpili Ọlọrun, di alaimọ, a si sọ wọn di alaiwulo fun Ọlọrun lati lo fun ogo rẹ. Ikeji, iṣekuṣe a ma so eniyan pọ pẹlu awọn ẹlomiran ni ọna ti ko mọ, a si ṣi ilẹkun fun oniruru iṣoro ti ko yẹ ki o jẹ tirẹ silẹ lati wọle sinu aye rẹ. Ikẹta, iṣekuṣe a ma fi eniyan si abẹ idajọ ti Ọlọrun ma n ṣe ni oorekore ati idajọ rẹ ti ayeraye. Ka tilẹ so otitọ, gbogbo arun ti o ma n tankẹlẹ nipasẹ ibaraẹnisun ti a mọ loni ni o jẹ ifarahan idajọ Ọlọrun lori agbere ati iṣekuṣe laarin awọn eniyan.

Nitorina, ko si nkan ti o ṣe ọ ti o ba takete si iṣekuṣe. Ko si nkan ti o ṣe ọ ti o ba jẹ wundia, niwọn igba ti o ko ti ṣe igbeyawo. Ko si nkan ti o ṣe ọ ti o ba ma a gbe pẹlu ọkunrin tabi obinrin ti ẹ ko ti fẹ ara yin sile. Ko si si nkan ti o ṣe ọ ti o ko ba fi ara rẹ jin fun awọn aworan eeri ati oniruru nkan irira ti o n ba aye ọpọlọpọ jẹ loni.

Lotitọ, gẹgẹ bi mo ti ṣe sọ siwaju, awọn ti aye yi ti o wa ni ayika rẹ le fẹ ki o ro pe nkan ṣe ọ tabi pe o n padanu lọpọlọpọ nipa pe o ko darapọ mọ wọn ni ṣiṣe agbere. Ma ṣe da wọn lohun rara tabi ki o banujẹ nitori isọkusọ wọn. Oju ọna ti o tọ ni o wa. Ati wipe, yatọ si pe aye rẹ yo wa ni ipamọ kuro lọwọ awọn aisan buburu ati awọn aisan ti ko lorukọ, lọjọkan, Oluwa, ti o n fi gbogbo igba bu ọla fun pẹlu ara rẹ, yi o gbe ọ nija, yi o si san ọ lẹsan fun jijẹ olotitọ si.

Ọsẹ ire o.

Copyright © 2020, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to alaythiabiblechurch@gmail.com/alaythia4all@gmail.com or call: 08037592851 (WhatsApp Number: 07085711280)
Lati owo: J.O. Lawal | Ojo: Owewe 20, 2020 | Atelera: Latori tabili Paitọ | Nomba: Vol. 9, No. 20

Latori tabili Paitor

Lo ẹbun ẹmi rẹ

Latori tabili pasito

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Owewe 2020. Adura mi si ni pe ki Ọlọrun ṣi oju rẹ lati mọ ohun rere gbogbo ti O ti gbin sinu rẹ, ki O si tun fun ọ ni okun lati le pọ si ni wiwulo pẹlu rẹ, ni orukọ Jesu. Amin.

Ẹnikọọkan wa, bi a ti ri kedere ninu bibeli, ni Ọlọrun ti bukunfun pẹlu, okereju, ẹbun ẹmi kan tabi omiran. Eyi tunmọ si pe ko si ọmọ Ọlọrun kan ti Ọlọrun lero lati lo lati bukufun awọn ọmọ rẹ yoku ati awọn ara aye yi ni ọna ti o ga. (Wo: 1Korinnti 12:7) O wa ṣeni laanu pe, nitori aimọkan, ọpọ awọn ọmọ rẹ ni ko fi taratara wulo ni lilo awọn ẹbun ti O fi fun wọn. Nitorina, a ri wipe, ni ọpọ awọn ijọ wa ati ni ọpọ igba, ni o jẹ wipe awọn perete ni o n lo ẹbun wọn pẹlu imura ati ni ododo lati fi ẹbun na sin awọn miran. Nse ni awọn ọmọ ijọ yoku a ma fi gbogbo igba duro de awọn ti yo sin wọn tabi misi wọn.

Boya iwọ na gan jẹ ọkan lara awọn ti o n fi gbogbo igba duro ki awọn miran wa sin wọn. Gbogbo igba ni o n fẹ ki ẹnikan gbadura fun ọ, ṣugbọn iwọ gan ko fẹ gbadura fun ẹnikankan. Tabi o n fẹ ki ẹnikan wa bẹ ọ wo, ṣugbọn iwọ gan ko ṣetan lati bẹ ẹnikẹni wo. Tabi o fẹ ẹni ti yo fun ọ ni nkan tabi ṣe iranwọ ohun kan tabi omiran fun ni aye rẹ, ti o si jẹ pe iwọ gan ko tilẹ nifẹ si a ti ran ẹnikẹni lọwọ. Mo fẹ ki o mọ pe eleyi lodi si ete Ọlọrun fun ijọ rẹ. Ko ki i ṣe aba tabi ero rẹ nigbakankan pe perete ninu awọn eniyan rẹ ni yo ma kopa ninu iṣẹ isin. Ki wa gan ni O fun ẹnikọọkan wa ni, okereju, ẹbun kan si?

Wo o, nkan ti Ọlọrun fẹ fun ẹnikọọkan wa ni ki a mọ ẹbun tabi awọn ẹbun ti O fun wa, ki a si bẹrẹ si ni kẹkọ lọdọ rẹ lori bi a se le lo wọn fun rere gbogbo awọn ti o wa ni ayika wa. Lọna yi, gbogbo wa yo dijọ ran ara wa lọwọ, a o si pese fun awọn nkan ti o ku diẹ kaato ninu igbagbọ, iwa ati nkan ini wa. Bi a ba si ṣe n ran ara wa lọwọ lọna yi, a o bẹrẹ si ni dagba si ninu imọ Jesu Kirisiti ti a ni ati ninu fifi iwa rẹ han ninu aye okunkun yi. (Wo: Efesu 4:11-16)

Idi yi gan wa ni Pọọlu, ninu lẹta rẹ si awọn ara Roomu, ṣe sọ wipe, “Njẹ bi awa si ti n ri ọtọọtọ ẹbun gba gẹgẹ bi oore-ọfẹ ti a fun wa, bi o ṣe ti isọtẹlẹ ni, ki a maa sọtẹlẹ gẹgẹ bi iwọn igbagbọ wa; Tabi iṣẹ iranṣẹ, ki a kọju si iṣẹ iranṣẹ wa: tabi ẹni ti n kọ awọn eniyan, ki o kọju si kikọ rẹ; Tabi ẹni ti o n gba awọn eniyan niyanju, si igbiyanju: ẹni ti o n fi funni ki o maa fi inu kan ṣe e; ẹni ti n se olori, ki o maa se e ni oju mejeeji; ẹni ti n saanu, ki o maa fi inu didun ṣe e.” (Roomu 12:6-8) Lafikun, Peteru naa, ninu lẹta rẹ akọkọ, sọ wipe, “Bi olukuluku ti ri ẹbun gba, bẹẹ ni ki ẹ maa ṣe ipinfunni rẹ laarin ara yin, bi iriju rere ti oniruuru oore-ọfẹ Ọlọrun. Bi ẹnikẹni ba n sọrọ, ki o maa sọ bi ẹni ti Ọlọrun n gba ẹnu rẹ sọrọ; bi ẹnikẹni ba n ṣe iṣẹ iranṣẹ, ki o ṣe e bi agbara ti Ọlọrun fi fun un: ki a le maa yin Ọlọrun logo ninu ohun gbogbo nipasẹ Jesu Kirisiti, ẹni ti ogo ati ijọba jẹ tirẹ lailai ati lailai. Aami.” (1Peteru 4:10-11)

Iwọ na gbe ọrọ awọn apositeli yi yẹwo. Gbogbo rẹ n tọka si pataki ki ẹnikọọkan wa mọ ẹbun tabi awọn ẹbun ẹmi ti Ọlọrun ti fun un, ki o si bẹrẹ si ni lo fun imudagbasoke awọn miran ati fun iyin Ọlọrun. Nitorina, ki ni ẹbun ẹmi tabi kini awọn ẹbun ẹmi rẹ? Ma si ṣe sọ wipe, “Emi o ma ni ẹbun kankan,”nitori lati sọrọ bi eleyi ni lati sọ wipe o ko ki i ṣe ọmọ Ọlọrun. Ti o ko ba mọ ẹbun ẹmi tabi awọn ẹbun ẹmi tirẹ, nse ni o yẹ ki o gbadura si Ọlọrun ki o si oju rẹ ki o ba le mọ wọn. Lafikun, o tun le ba awọn onigbagbọ ti o le fọkan tẹ sọrọ pe ki wọn sọ irufẹ awọn ẹbun ti wọn ba kofiri ninu aye rẹ fun ọ. Nikete ti o ba si ti mọ ẹbun tabi awọn ẹbun ẹmi rẹ, nse ni ki o bẹrẹ si ni lo wọn pẹlu ifẹ. Ọlọrun yo si bukunsi gbogbo igbesẹ igbagbọ ti o ba gbe lori lilo ẹbun rẹ, yi o si tun lo lati bukunfun awọn eniyan ni ọna ti o kọja ero ẹnikankan.

Lakotan, ma ṣe jẹ ki a fi igba kankan gbọ ki o ma sọ ohunkohun ti o ba jọ eyi, “Ẹbun temi ko ma ja mọ nkankan. Nitorina, tani yo tilẹ se bi pe wọn ri mi tabi ta gan ni ẹbun na fẹ wulo fun?” Bibeli sọ fun wa pe ko si ẹbun ẹmi ti a le ka si yẹpẹrẹ. Nkan ti o le sọ ẹbun ẹmi di yẹpẹrẹ ni ki a kọ lati lo. Dọkasi ko ki i ṣe oniwasu. Ṣugbọn awọn ọmọ ijọ rẹ ka si eniyan pataki nitoripe o lo ẹbun fififunni ti o ni pẹlu otitọ ati pẹlu akunyawọ (Ise Aposteli 9:36-42). Ti iwọ na ba ṣe amulo ẹbun rẹ, ko ni pẹ rara ti awọn ti o wa ni ayika rẹ yo fi bẹrẹ si ni fi ẹbun rẹ tọrọ lọwọ Ọlọrun. Mo si gbadura pe ki Ẹmi Ọlọrun fi okun kun ọkan rẹ ki o ba le ṣe ohun ti o tọ lori ọrọ yi. Amin.

Ọse ayọ o.

Copyright © 2020, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to alaythiabiblechurch@gmail.com / alaythia4all@gmail.com or call: 08037592851 (WhatsApp Number: 07085711280)
Lati owo: J.O. Lawal | Ojo: Owewe 13, 2020 | Atelera: Latori tabili Paitọ | Nomba: Vol. 9, No. 19

Latori tabili Paitor

Ma jẹ ki wọn fa ọ lọ

Latori tabili pasito

Olufẹ: kaabọ sinu ọsẹ keji ninu osun Owewe 2020. Ki ore-ọfẹ Oluwa wa Jesu Kirisiti ṣan nitori rẹ, ki o si jẹ ki o dara fun ọ ninu ohun rere gbogbo ninu gbogbo ọsẹ na. Amin.

Bi a se bẹrẹ ọsẹ tuntun yi, mo fẹ gba ọ niyanju pẹlu ọrọ Apositeli Peteru ti o sọ pe, “Nitori naa ẹyin olufẹ, bi ẹyin ti mọ nnkan wọnyi tẹlẹ, ẹ maa kiyesara, ki a ma ba fi iṣina awọn eniyan buburu fa yin lọ, ki ẹ si ṣubu kuro ninu iduro ṣinṣin yin.” (2Peteru 3:17) Ki ni koko ilana ti Peteru fun wa nibi yi? Ohun na ni pe ki a kiyesera fun iṣina awọn eniyan buburu.

Njẹ awọn wo gan ni eniyan buburu? Wọn jẹ awọn kan ti ko bikita rara nipa ododo, iwa bi Ọlọrun, idajọ ododo, alaafia tabi ohunkohun ti o ba fi ogo fun Ọlọrun. Wọn jẹ awọn ti o ma n jẹ ki ibi dabi rere, ki rere si dabi ibi. Mo n sọrọ nipa awọn eniyan ti wọn n gbe igbe aye ti o n jẹ ki a ro wipe awọn olootọ, awọn olododo, awọn ti n wu iwa bi Ọlọrun ati awọn ti o n gbe igbe aye afarajin ya omugọ ti ko le gbadun aye yi tabi jamọ nkankan ninu rẹ ati pe awọn alarekereke, awọn alaimọlọrun, awọn onisekuse ati awọn alagabagebe nikan ni yoo gbadun aye.

Se otitọ wa ni pe iwa ododo ko lere lori pupọ ati pe iwa ika ni o lere lori julọ ninu aye yi? Bẹẹkọ, eyi ko ki ṣe otitọ rara. Lotitọ, o le dabi ẹnipe awọn ika, awọn oniṣekuṣe ati awọn alaisododo eniyan nikan ni o n jẹgbadun awọn nkan daradara ti aye yi, ti wọn si n ri awọn ipo pataki ti aye yi fi lo igba. Sugbọn eyi kan jọ bẹẹ ni; ko ri bẹẹ rara. Nitorina, ma jẹ ki a mu ọ ni omugọ tabi ki a tan ọ jẹ nipasẹ awọn igbe aye ẹtan ti ọpọ ika eniyan ti o wa ni ayika rẹ n gbe.

Ti o ba ka Saamu 73, iwọ na yo ri nkan ti ẹni ti o ko orin yi ni i sọ lori jijowu awọn eniyan ika. Bi ọkunrin yi ṣe fi ye wa, akoko kan wa ni igbesi aye rẹ ti o bẹrẹ si ni fi igbesi aye rẹ we ti awọn ika eniyan ti o wa ni ayika rẹ, awọn ti wọn n fi gbogbo igba pọ si ninu ọrọ, agbara ati iyi ninu iwa ika ati igberaga wọn. Nitori eyi, ọrọ aye rẹ su u, o ṣi bẹrẹ si ni ro wipe ofo lasan ni gbogbo ifarajin rẹ lati sin Ọlọrun ati lati rin ninu ododo rẹ. (Wo: Saamu 73:2-14)

Ṣugbọn ọpẹ si Ọlọrun ti O dari olukọ Saamu yi sinu Ile Mimọ rẹ, ti O si fi otitọ han nibẹ nipa igbe aye awọn ika eniyan. Nibẹ ni o ti wa ri funrarẹ pe ko si bi ika eniyan ti le ni ọla ati agbara to ninu ika sise ni aye yi, airoju ati irora ayeraye ni yo jẹ ipin rẹ nigbẹyingbẹyin. O tun ri ninu Ile Mimọ Ọlọrun pe ko si nkankan ti aye yi ni lati fun wa ti a le fi we nkan ti Ọlọrun ni lọkan lati jẹ si ati lati fun awọn ti o gbẹkẹle, ti wọn si tun fẹran rẹ. Nitori eyi, o wa sọ wipe, “Ta ni mo ni ni ọrun bi ko se iwọ? Ko si si ohun ti mo fẹ ni aye ayafi iwọ. Aarẹ mu ara ati ọkan mi: Ṣugbọn Ọlọrun ni agbara ọkan mi, ati ipin mi laelae.” (Saamu 73:25-26)

Wayi o, iwọ nilo lati ri Ọlọrun gẹgẹ bi agbara ọkan rẹ ati ipin (ere) rẹ ninu aye yi. Aijẹbẹ, ki o to mọ nkan ti o n ṣẹlẹ, o ti gbagbe ara rẹ, a o si ti fa ọ lọ lati mu o ṣina nipasẹ ikuna awọn eniyan ika ti o wa ni ayika rẹ, ti wọn o ma fi igba gbogbo gbiyanju lati tan ọ jẹ ati lati jẹ ki o ro wipe o n padanu awọn nkankan nitoripe o ko tẹle wọn lati rin irin omugọ. Ranti pe Peteru sọ fun wa pe ti a ko ba kiyesara lori ikuna awọn eniyan wọnyi, a o subu kuro ninu iduro ṣinṣin wa ninu Kirisiti. Eyi tunmọ si pe o ṣeeṣe ki eniyan jabọ kuro ni ibi ti ore-ọfẹ ati oju rere Ọlọrun wa, ki o si run aye rẹ, ti ko ba kiyesi lati pa ọkan rẹ mọ kuro ninu aiwabiọlọrun ti o wọpọ ninu aye yi. Adura mi si ni pe iwọ ko ni subu tabi sọ aaye rẹ ninu ete Ọlọrun nu. Sugbọn iwọ na gbọdọ ṣọra, ki o si ri wipe ọkan rẹ ko tele itanjẹ awọn alaiwabiọlọrun ti o n rin ni ọna iparun.

Ki o ni ọsẹ ire o.

Copyright © 2020, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to alaythiabiblechurch@gmail.com/alaythia4all@gmail.com or call: 08037592851 (WhatsApp Number: 07085711280)
Lati owo: J.O. Lawal | Ojo: Owewe 06, 2020 | Atelera: Latori tabili Paitọ | Nomba: Vol. 9, No. 18

Latori tabili Paitor

Jẹ ẹni ti o n ṣe ojuṣe rẹ lọna gbogbo

Post author By Pastor J.O. Lawal
Post date August 30, 2020
1 Comment on Jẹ ẹni ti o n ṣe ojuṣe rẹ lọna gbogbo

Latori tabili pasito

Olufẹ: ki ore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ ku ikalẹ sinu ọjọ isinmi ti o kẹyin osu yi, mo si gbadura pe ki Ọlọrun kọ ọ, ki O si tun fi okun kun ọkan rẹ lati ma fi gbogbo igba gbe igbe aye ẹni ti o wulo ninu ibasepọ ati iṣẹ ọwọ rẹ gbogbo ni ọsẹ yi ati ni iyoku ọjọ aye rẹ. Amin.